mars 30
Stjórnin kemur saman á brjáluðu balli á 600 Akureyri á föstudaginn langa – Aðeins þetta eina sinn fyrir norðan.
Í þessu stuð-megamixi eru öll bestu Stjórnarlögin, hvernig væri nú að hækka í botn, standa upp frá vinnunni og MISSA SIG AÐEINS..!! Sjáumst á Akureyri!
jan. 11
Sinfóníuhljómsveitin býður nú til Bond-veislu þar sem fluttir verða allir helstu smellirnir úr myndunum, meðal annars You Only Live Twice, Nobody Does It Better og A View To a Kill. Breski stjórnandinn og tónskáldið Carl Davis hefur stýrt Bond-tónleikum víða um heim við góðan orðstír.
Íslenskir söngvarar í fremstu röð taka þátt í tónleikunum. Árið 2012 eru 50 ár liðin frá því að James Bond birtist í fyrsta sinn á hvíta tjaldinu, í myndinni Dr. No með Sean Connery í aðalhlutverki. Eitt af því sem einkennir Bond-myndirnar er frábær tónlist. Titilstefið þekkja flestir enda hefur það fylgt myndunum frá upphafi.
Ég á að syngja lögin Golden Eye, Licence to kill og Goldfinger en einnig verða þarna lög eins og From Russia with love, A view to a kill, For your eyes only, Live and let die, Diamonds are forever ásamt öllum hinum.
Uppselt er á tónleikana 19.jan og 20.jan en miðasala er hafin á aukatónleikana 21.janúar. Þetta verður meiriháttar!
des. 31
Kæru vinir nær og fjær,
Árið 2011 var svo sannarlega ár breytinga og nýrra upplifanna hjá mér og minni fjölskyldu. Um páskana komu tvíburarnir okkar í heiminn og síðan þá hefur aldeilis verið fjör á heimilinu. Á haustmánuðum kom Söngvaborg 6 út og um jólin hélt ég tónleika í Háskólabíói sem tókust afskaplega vel. Framundan er annað stórt ár í mínu lífi þar sem ég mun fagna 50 ára afmælinu sem og 30 ára starfsafmæli.
Ég óska ykkur öllum gleðilegs árs og friðar og farsældar inn í árið 2012.
des. 17
Kæru vinir, mig langar að þakka ykkur hjartanlega fyrir einstaklega fallega og skemmtilega stund sem við áttum saman á jólatónleikunum mínum. Þið eruð frábær, mikið er ég þakklát fyrir að fá að syngja fyrir ykkur :)
Ljósmyndir: Vigfús Birgisson
nóv. 22
Nýja jólalagið er nú tilbúið og heitir „Jólin koma með þér.“ Það er samið af Ásgeiri Val frænda mínum og það er Páll Óskar sem tekur lagið með mér.
nóv. 3
Söngvaborg 6 er farin í framleiðslu og verður fáanleg frá og með 20.nóvember. Þetta er án efa flottasta Söngvaborgin hingað til, stútfull af skemmtilegu og fræðandi barnaefni í formi söngs, dans og leikinna atriða. Subbi Sjóræningi, Masi, Lóa (Ó)kurteisa og Georg taka lagið með Siggu og Maríu og taka sér margt spennandi fyrir hendur.
Margt óvænt og skemmtilegt gerist að venju í Söngvaborg, til dæmis fara Sigga, María og Lóa í heimsókn til Georgs á suðurpólinn og þær heimsækja einnig Masa til Ástralíu, en Masi hefur frá mörgu áhugaverðu að segja um heimalandið sitt og kynnir þær fyrir mömmu sinni. Masi fer einnig í fimleika og Subbi sjóræningi byrjar að flokka ruslið sitt öllum að óvörum. Lóa fer til tannlæknis og tekur Masa með sér og Ingó heimsækir Söngvaborg svo nokkur dæmi séu tekin.
Söngvaborgin var að þessu sinni tekin upp í Green Screen í Latabæjarstúdíóinu og að gerð hennar komu margir snillingar, svo sem Helga Braga (leikstjóri), Birna Björnsdóttir (danshöfundur), Björgvin Franz Gíslason (Masi og Subbi Sjóræningi), Eggert Kaaber (Georg Mörgæs) og svo auðvitað við María Björk ásamt fjölda skemmtilegra og hæfileikaríkra barna.
okt. 4
Miðasala á jólatónleikana mína „Á Hátíðlegum Nótum“ í Háskólabíói þann 11.desember stendur nú yfir á www.midi.is.
Miðaverð er kr. 4.990. Tryggðu þér miða í tíma, síðast var uppselt á tónleikana og komust færri að en vildu.
sept. 27
Undirbúningur og upptökur standa nú yfir á Söngvaborg 6 sem kemur út í nóvember. Eins og áður fyrr verða með okkur Maríu Björk þau Masi, Lóa, Georg og Subbi Sjóræningi ásamt börnum og góðum gestum.
Eins og alltaf þá verður mikið um að vera enda lendum við í mörgum nýjum ævintýrum ásamt því að syngja, dansa og fræðast um alls kyns hluti. Þetta verður skemmtilegt, fylgist vel með og tryggið ykkur eintak í jólapakkann í ár :)
Markmið Söngvaborganna er að kenna börnum og fræða í gegnum sönginn en hafa jafnframt af því ánægju. Á Söngvaborgardiskunum er að finna bæði klassísk íslensk barnalög í bland við ný og erlend lög.
sept. 19
Hin söngelsku systkin Páll Óskar og Diddú verða sérstakir gestir mínir á jólatónleikunum í ár. Stemningin í fyrra var hátíðleg, skemmtileg og einlæg og því ætlum við að endurtaka leikinn í ár. Það er mér mikill heiður og ánægja að fá þau til liðs við mig á ný og eitt er víst að það verður einstök stemning í Háskólabíói þann 11.desember. Hlakka til að sjá ykkur öll :)
Linen Theme by The Theme Foundry
Copyright © 2012 Sigga Beinteins. All rights reserved.